Lögreglan komst ekkert áfram við rannsókn málsins og fjölskylda hennar fékk því engin svör við hver tók Terri frá henni. Los Angeles Times skýrir frá þessu. Haft er eftir bróður hennar, Randy Hollis, sem var 16 ára þegar Terri var myrt, að fjölskyldan hafi minnst hennar á hverri einustu þakkargjörðarhátíð síðan hún var myrt.
Foreldrar þeirra eru látin sem og tvö önnur systkin en Randy er á lífi og systir hans Tammy Hollis. Þau höfðu fyrir löngu gefið upp alla von um að lögreglunni tækist að komast að hver myrti Terri. En lögreglan í Bandaríkjunum gefst ekki svo auðveldlega upp og tekur mál til rannsóknar á nýjan leik ef nýjar vísbendingar koma fram eða ef tækninni fleygir svo fram að það veki vonir um að hægt sé að upplýsa gömu mál.
Fyrir nokkrum vikum síðan biðu tveir lögreglumenn í innkeyrslunni við heimili Randy þegar hann kom heim. Þeir voru komnir til að segja honum að þeim hefði tekist að finna mann sem væri grunaður um að hafa myrt Terri.
„Þetta kom mér mjög á óvart eftir allan þennan tíma. Þetta vakti upp margar erfiðar minningar.“
Sagði Randy í samtali við Los Angeles Times.
Á miðvikudag í síðustu viku mættu Randy og Tammy á lögreglustöðina í Torrance og fylgdust með þegar lögreglan skýrði í smáatriðum frá niðurstöðu rannsóknarinnar. DNA, sem fannst á líki Terri, hafði verið borið saman við DNA eins af ættingjum hins grunaða en DNA ættingjans var skráð í gagnagrunn. Þessi samkeyrsla varð til þess að lögreglan komst að því að maðurinn sem að öllum líkindum myrti Terri hét Jake Edward Brown. Hann lést árið 2003 en hann komst margoft í kast við lögin á ævi sinni. Hann var meðal annars handtekinn fyrir vörslu fíkniefna og tvær nauðganir, sem hann framdi 1973 og 1974.
Aðferðin sem lögreglan notaði er sú sama og varð Golden State morðingjanum að falli en hún leiddi til þess að hinn 73 ára Joseph James DeAngelo var handtekinn grunaður um að vera hinn alræmdi raðmorðingi og raðnauðgari.
Frá því að Terri var myrt 1972 vann lögreglan út frá mismunandi kenningum. Um 2.000 yfirheyrslur fóru fram og mörgum ábendingum var fylgt eftir en án árangurs. Karlmaður var þó handtekinn 1974 grunaður um að hafa myrt Terri en honum var síðan sleppt því sönnunargögn studdu ekki þá kenningu að hann hefði átt hlut að máli.
En DNA-rannsókninni varð til þess að á síðasta ári fóru lögreglumenn til Arizona, þar sem Jake Edward Brown var jarðsettur. Lík hans var grafið upp og lífsýni tekin úr því og á grunni rannsókna á þeim tókst að sannreyna að það var hann sem myrti Terri.
