Það er ekki að ástæðulausu að ungmenni sem vilja fá ökuréttindi þurfi að fara í gegnum bóklegt og verklegt nám undir leiðsögn ökukennara.
Tomas Mejia, 42 ára karlmaður í Houston í Bandaríkjunum, leyfði 12 ára dóttur sinni að setjast undir stýri á dögunum og aka fjölskyldubifreiðinni. Það fór ekki betur en svo að stúlkan steig á bensíngjöfina þegar hún hugðist stíga á bremsuna með þeim afleiðingum að hún ók á gangandi vegfarenda sem var úti að viðra hundinn sinn. Bæði vegfarandinn, 47 ára karlmaður, og hundurinn hans dóu í slysinu.
Mejia var handtekinn í kjölfarið og gæti hann átt þungan fangelsisdóm yfir höfði sér.
„Það er ekki undir neinum kringumstæðum í lagi að leyfa tólf ára barni að aka bifreið,“ segir fulltrúi saksóknaraembættisins í Harris-sýslu. Hann segir að um mikinn harmleik sé að ræða en því miður sé þetta ekki fyrsta tilfellið þar sem börn setjast undir stýri á meðan foreldrar fylgjast með.