Nú eru 25 ár liðin frá því að sýningar hófust á hinum geysivinsælu sjónvarpsþáttum um Vini (Friends). Þættirnir eiga sér tryggan aðdáendahóp sem horfir enn á þættina þrátt fyrir að hafa séð þá oftar en hægt er að festa tölu á. Þessi sami hópur hlýtur nú að gleðjast mikið því 1. september næstkomandi koma kubbasett, frá Lego, byggð á þáttunum á markaðinn.

Í fréttatilkynningu frá Lego kemur fram að ef fólk langar að setjast niður og raða 1.079 kubbum saman til að eiga eigin míníútgáfu af Central Perk kaffihúsinu, þar sem vinirnir eyddu miklum tíma, þá styttist í að það verði hægt.

Að sjálfsögðu eru litlar útgáfur af Rachel, Monica, Phoebe, Ross, Joey og Chandler í settinu. Og Gunther, hinn ómissandi þjónn, er einnig með í settinu. Hægt er að gera eitt og annað úr kubbunum, til dæmis endurgera atriðið það sem Phoebe kom fram og söng og Ross spilaði á hljómborð.

Þetta er ekki í fyrsta sinn sem Lego setur kubbasett úr vinsælum sjónvarpsþáttum á markaðinn. Til dæmis hafa verið gerð sett úr The Simpsons og The Big Bang Theory sem og Stranger Things þáttum Netflix.