Donnie Johnson, fangi á dauðdeild í Tennessee í Bandaríkjunum, verður að óbreyttu tekinn af lífi í kvöld með banvænni sprautu. Donnie var dæmdur til dauða fyrir að drepa eiginkonu sína árið 1984. Þá var hann 33 ára en hún 30 ára.
Donnie var dæmdur fyrir að kæfa hana með því að troða plastpoka ofan í háls hennar.
Fangar á dauðadeild geta valið síðustu máltíð sína en í fréttum bandarískra fjölmiðla kemur fram að Donnie hafi valið að gefa heimilislausum sína máltíð. Þess er getið í umfjöllun bandarískra fjölmiðla að beiðni hans hafi verið hafnað. Fangar hafa tuttugu Bandaríkjadali sem þeir geta ráðstafað í mat að vild.
Donnie er sem fyrr segir búinn að sitja í fangelsi í 35 ár og báru tilraunir lögmanns hans, um að fá dómnum breytt í lífstíðarfangelsi, ekki árangur.
Donnie og eiginkona hans, Connie, áttu tvö ung börn saman þegar morðið var framið; Cindy og Jason. Donnie skrifaði bréf til barna sinna og fjölskyldu eiginkonu sinnar þar sem hann bað þau afsökunar á gjörðum sínum. Sagðist hann sjá mikið eftir gjörðum sínum.
