Spennan á milli Bandaríkjanna og Íran fer enn vaxandi. Fyrir stundu tilkynntu bandarísk stjórnvöld að nær allir starfsmenn Bandríkjastjórnar í Írak eigi að yfirgefa landið strax vegna vaxandi spennu í sambandi Íran og Bandaríkjanna.

Spennan í samskiptum ríkjanna hefur farið vaxandi undanfarna daga. Í síðustu viku sögðu bandarísk stjórnvöld að þau hefðu tekið eftir nýjum ógnunum frá Íran og bandamönnum þeirra við Persaflóa sem beinast gegn Bandaríkjamönnum og bandarískum hagsmunum.

Í morgun sagði æðsti trúarleiðtogi Íran að það væri ekki erfitt verkefni fyrir Írana að auðga úran en það er nauðsynlegt við framleiðslu á kjarnorkuvopnum. Þetta er nýjasta hótun Írana í deilum þeirra við Bandaríkin vegna kjarnorkuáætlunar þeirra og annarra mála.

Í gær var ráðist á olíuleiðslur í Sádi-Arabíu með fjarstýrðum drónum. Grunur leikur á að samtök hliðholl Írönum hafi verið að verki.

Í gær fluttu bandarískir fjölmiðlar fréttir af því að Bandaríkjastjórn ætli að flytja 120.000 hermenn til Persaflóa vegna yfirvofandi stríðsátaka. Donald Trump, forseti, vísaði þessu á bug en sagði að tugir þúsunda hermanna verði sendi til Persaflóa ef til átaka kemur.