Að minnsta kosti átta manns létust í eldsvoða í fjölbýlishúsi í einu af hverfum efnafólks í París í nótt. Talsmaður slökkviliðsins segir að dánartalan geti enn hækkað því eldur logi enn á sjöundu og áttundu hæð hússins.

Eldurinn kom upp í átta hæða húsi í sextánda hverfi í nótt. Hverfið er vinsælt meðal ferðamanna og þar eru margar verslanir og veitingastaðir. Auk þeirra sem létust slasaðist einn alvarlega og 27 til viðbótar, þar af þrír slökkviliðsmenn, voru fluttir á sjúkrahús með minniháttar meiðsl.

Íbúar í húsinu höfðu sumir flúið upp á þak eða út um glugga og þurftu slökkviliðsmenn að bjarga fjölmörgum sem voru fastir uppi á þaki eða á gluggasyllum.

200 slökkviliðsmenn eru enn á vettvangi að berjast við eldinn að sögn Sky.

Lögreglan telur ekki útilokað að um íkveikju hafi verið að ræða. Kona hefur verið handtekin grunuð um að hafa kveikt í húsinu að sögn Sky.