Í umfjöllun CNN um málið kemur fram að á mörgum svæðum í norðanverðri Ástralíu séu allt að rúmlega 40 prósent fullorðinna með vírusinn. Verst er ástandið í bæjum þar sem ástralskir frumbyggjar eru margir.
Robert Gallo uppgötvaði HTLV-1 vírusinn fyrir tæplega 40 árum. Hann hefur miklar áhyggjur af þróun mála. Hann segist ekki skilja af hverju ekki sé lögð meiri áhersla á rannsóknir á hvernig er hægt að hemja útbreiðslu vírussins.
„Fjöldi smitaðra er kominn úr böndunum. Enginn, sem ég veit um í heiminum, hefur gert eitthvað til að reyna að meðhöndla þennan vírus. Það eru fáar, nánast engar, tilraunir til að búa til bóluefni nema japönsk rannsókn. Það er því galopið fyrir rannsóknir til að þróa bóluefni.“
Sagði hann í samtali við CNN.
Graham Taylor, prófessor við Imperial College London, segir að ástæðan fyrir áhyggjum lækna nú sé hversu algengur hann er meðal frumbyggja Ástralíu. Líklegast hafi engin þjóðfélagshópur svo hátt smithlutfall. Hann benti á að HTLV-1 sé einnig að finna í nokkrum öðrum ríkjum.
Vitað er að vírusinn er að finna í Japan, hlutum Karabískahafsins, Brasilíu, Perú, Kólumbíu, hlutum Afríku og nokkrum ríkjum í Miðausturlöndum.
Taylor lagði áherslu á að fólk þurfi þó ekki að óttast útbreiðslu vírussins því smitleiðir hans eru fáar. Hann smitast við brjóstagjöf, óvarið kynlíf og blóðblöndun en ekki með lofti eða hráka.
Taylor sagði að stærsta vandamálið væri að afar fá ríki skimi eftir vírusnum og þess vegna séu líkur á að hann berist á milli fólks við blóðgjafir og líffæragjafir.
Bandarísku samtökin National Organization for Rare Disoreders segja að 10-20 milljónir manna um allan heim séu sýktir af HTLV-1 vírusnum. Dánarhlutfallið er mjög hátt því ekki er til lækning við mörgum þeirra sjúkdóma sem vírusinn veldur.
