Breska lögreglan fann tvær sprengjur í norðvesturhluta borgarinnar í gærmorgun. Þær voru í íbúð í Craven Park í  Harlesden og voru tilbúnar til notkunar. Enginn var í íbúðinni en unnið var að endurbótum á henni.

Íbúðin og næstu íbúðir voru rýmdar og götum lokað á meðan sprengjusérfræðingar gerðu sprengjurnar óvirkar. Þær voru síðan fluttar á brott. Enginn hefur verið handtekinn vegna málsins. Sky segir að lögreglan segist „vera með opinn huga“ varðandi hver eða hverjir hafi komið sprengjunum fyrir í íbúðinni.

Næst hæsta viðvörunarstig vegna hryðjuverka er í gildi í Bretlandi.