39 ára kona fór út að ganga með fjölskylduhundinn um klukkan 10 í gærmorgun í Åros í Buskerud í Noregi. Þá voru eiginmaður hennar og börn í vinnu og skóla. Það var því ekki fyrr en þau komu heim síðdegis að uppgötvaðist að konan hafði ekki skilað sér heim úr göngutúrnum. Fjölskyldan byrjaði á að leita hennar í nágrenninu en án árangurs. Eiginmaður tilkynnti því lögreglunni um hvarf hennar síðdegis í gær og hófst þá leit.

Lögreglan hóf strax leit að konunni og þyrla var fengin til leitar. Sjálfboðaliðar, meðal annars frá norska leitarhundarfélaginu og Rauða krossinum, voru einnig fengnir til leitar. Leit hefur staðið yfir í alla nótt en án árangurs að sögn TV2.

Konan er vön að fara með hundinn út í skóg og á akur í nágrenni við heimili hennar. Svæðið er erfitt yfirferðar og gerir leitina erfiða. Talsmaður lögreglunnar segir að lögreglan hafi enga hugmynd um hvar konan geti verið niðurkomin og að eins og staðan sé núna bendi ekkert til að hún hafi orðið fórnarlamb glæps.