„Við seljum alls konar íslenskan mat, hefðbundinn mat sem er ekki víða til nema hluta úr árinu. Við seljum til dæmis súrmat, þar á meðal hárkarl, og reynum að vera með gott úrval. Þá bjóðum við upp á hrossakjöt, bæði hrossabjúgu og saltað hrossakjöt. Þessi matur er oftar en ekki ófáanlegur í verslunum, eða er mjög stopult á boðstólum þar,“ segir Sigurður Tómas Garðarsson, sem rekur fyrirtækið Deplu og er með bása í Kolaportinu.
Sigurður segir að erlendir ferðamenn séu afar spenntir fyrir því að smakka hákarlinn. Síðast en ekki síst selur Sigurður mjög mikið af harðfiski.
„Við erum með tvo bása hérna í Kolaportinu og það er nóg að gera. Oftast erum við tvö til þrjú við afgreiðslu í senn,“ segir Sigurður.
Kolaportið er opið alla laugardaga og sunnudaga frá kl. 11 til 17. Kolaportið er einstakur markaður í hjarta borgarinnar, staðsett í Tryggvagötu 19. Sjá nánar á vefsíðunni kolaportid.is