Dior tískuhúsið opnaði miðvikudaginn 5. júlí síðastliðinn stærstu sýningu sem haldin hefur verið á hátísku í París. Tilefnið er 70 ára afmæli tískuhússins og verður sýningin opin næstu sex mánuði í Musée des Arts Décoratifs.

Sýningin varpar ljósi á öll tímabil í tískuhönnunarsögu Dior með flíkum eftir helstu hönnuði hússins, þar á meðal Christian Dior, Yves Saint Laurent, Marc Bohan, Gianfranco Ferre, John Galliano, Raf Simons og Maria Grazia Chiuri.
Á sýningunni má dást að yfir 300 hátískukjólum frá árunum 1947–2017, sem falla undir 23 ólík þemu. Á sýningunni má einnig finna efni, fjölda tískuljósmynda, listaverk fengin að láni frá helstu listasöfnum og frumskjöl og teikningar eftir hönnuðina Rene Gruau og Mats Gustafson.

Þetta er önnur sýning Dior á safninu, en sú fyrri var árið 1987 í tilefni af 40 ára afmæli tískuhússins.