Allir sem glímt hafa við þunglyndi vita að það er auðvelt að festast í vítahring neikvæðni og vonleysis. Gala Darling, 32 ára nýsjálensk kona, þekkir það af eigin raun en hún glímdi við þunglyndi og átröskun um nokkurra ára skeið.
Með mikilli vinnu og nokkrum grundvallarbreytingum á lífi sínu tókst Gala að vinna bug á þessum erfiðleikum.
En hvernig fór hún að þessu? Gala hefur nú skrifað bók sem ber heitið Radical Self Love, sem á íslensku væri hægt að þýða sem Róttæk sjálfsást. Óhætt er að segja að bókin hafi fengið góð viðbrögð þegar hún fór í sölu á Amazon í fyrrasumar, en þar er bókin með fjórar stjörnur af fimm mögulegum.
Um er að ræða einskonar sjálfshjálparbók og segir Gala í samtali við Daily Mail í Ástralíu að hún hafi alla tíð verið efins um ágæti og gagnsemi sjálfshjálparbóka. Hún segist þó ekki velkjast í neinn vafa um að bókin geti hjálpað fólki, þá sér í lagi konum sem þjást af litlu sjálfstrausti. Hún gefur lesendum smá innsýn inn í bókina, en hér á eftir fylgja þrjár mikilvægustu breytingarnar sem hún gerði.
Gala segir að kraftaverkin hafi farið að gerast þegar hún fór að tileinka sér þakklæti í auknum mæli. Það er hægt að vera þakklátur fyrir margt annað en það stærsta og besta í lífinu. Oft eru það litlu hlutirnir, sem margir taka sem sjálfsögðum hlut, sem mest um vert er að sýna þakklæti gagnvart. „Þegar við erum þakklát fyrir það sem við höfum þá förum við síður í að bera okkur saman við aðra. Þetta hljómar mjög einfalt en þetta getur breytt sýn þinni á lífið.“
Gala segir sjálfsummönnun (e. self care) sé lykilþáttur í leitinni að hamingjuríku lífi. Passaðu að hafa nægan tíma fyrir sjálfa þig og framkvæmdu hluti sem veita ÞÉR ánægju. „Líðan þín núna er sýnishorn af því hvernig líðan þín mun verða í framtíðinni. Svo ef þér líður illa, framkvæmdu eitthvað sem lætur þér líða vel.“
Eitt af því sem Gala nýtti sér með góðum árangri var að skrifa niður allt það hrós sem hún fékk. „Mannfólkið hefur þá tilhneigingu að festast í viðjum eigin neikvæðni. Við munum eftir öllu því neikvæða sem sagt er við okkur en ekki því jákvæða.“ Hún segir að ef þú skrifar niður allt það hrós sem þú færð þá geturðu leitað þér huggunar í jákvæðum athugasemdum á erfiðum dögum, dögum þegar óveðursskýin virðast vera að hrannast upp. Gala segir að þér muni líða betur og fyrr en varir fari sólin að skína – að minnsta kosti í sálinni.
