„Skátarnir byrjuðu að selja Sígræna jólatréð – gervijólatré – fyrir 23 árum. Þessi tré endast gríðarlega vel, svo vel að þau eru að erfast á milli ættliða. Þetta er innflutt vara, hágæða tré sem hafa reynst mjög vel. Allur ágóði af jólatréssölunni fer beint í æskulýðsstarf skátanna.“

Þetta segir Torfi Jóhannsson, framkvæmdastjóri Skátabúðarinnar, en gervijólatré frá skátunum eru klárlega mjög góður kostur í þeim tilvikum þegar lifandi jólatré henta ekki. Torfi telur að notkun gervitrjáa fari vaxandi: „Margir verða sífellt þreyttari á öllu barrinu, þrifunum og veseninu sem fylgir lifandi trjám. Og sumir hafa ofnæmi fyrir gróðrinum,“ segir Torfi en telur þó að lifandi jólatré hafi sannarlega mikla kosti og mikinn þokka til að bera. Sígræna jólatréð sé hins vegar góður valkostur til hliðar við þau: „Það er gott að eiga tréð alltaf niðri í geymslu og þurfa ekki að huga að jólatréskaupum fyrir hver jól. Svo er líka gott að geta byrjað að skreyta fyrr fyrir jólin, margir eru farnir að skreyta um miðjan desember og jafnvel fyrr.“

Sígræna jólatréð frá skátunum endist gríðarlega vel og er selt með tíu ára ábyrgð. Hægt er að skipta um einstaka greinar í því, eða eins og Torfi segir sposkur: „Já, það er hægt að fá varahluti.“

Þó að Sígræna jólatréð sé innflutt er það framleitt í samræmi við fyrirmæli frá Skátabúðinni og hannað með þeim hætti að það líkist sem mest normannsþini, sem Íslendingar þekkja vel. Efnið sem notað er í tréð er þykkara en á flestum öðrum trjám og það er jafnframt ekki eins eldfimt og önnur gervitré. Í trénu er þykkara plast en gengur og gerist með gervitré, sem veldur því að greinarnar leggjast síður niður, við geymslu milli jóla, og tréð virkar eðlilegra þegar komið er við það.

Sígræna jólatréð kostar frá 5.900 krónum en mikill fjöldi stærða er í boði og er verðið breytilegt eftir stærðum.

Minnstu trén eru 60 sentimetrar á hæð og þau stærstu heilir fimm metrar. Stærstu trén prýða anddyri í húsnæði ýmissa stórfyrirtækja.

Sígræna jólatréð er til sölu í Skátabúðinni, Hraunbæ 123. Frá og með miðjum nóvember verður hægt að skoða trén uppsett í búðinni. Jafnframt er hægt að kaupa trén í vefversluninni gervijolatre.is. Trén eru þá heimsend hvert á land sem er.