Susan Haslund, skemmtikraftur frá Árósum í Danmörku, kom hingað hvert sumar árin 1974 til 1981. Hún ferðaðist um landið og sýndi nektardans í samkomuhúsum, veitingastöðum og karlaklúbbum. Íslendingar voru óvanir nektardansmeyjum og hvað þá því sem Susan bauð upp á. En sýningin varð engu að síður gríðarlega vinsæl hér. Í atriði sínu baðaði hún sig í ákaflega litlu baðkari og dillaði sér í allar áttir. Hún átti önnur atriði upp í erminni, kom fram í jólasveinsbúning og sem brúður. Baðkarið stóð samt upp úr og var auglýsingaherferðin byggð á því: „Susan baðar sig“. Susan lærði sálfræði og starfaði síðar sem leikskólakennari. Sagt var að hún væri bráðsnjöll og reglusöm, snerti hvorki áfengi né eiturlyf.