Um 300 manns tóku þátt í að bjarga 39 ferðamönnum sem lentu í ógöngum í sleðaferð við Langjökul á þriðjudaginn. Þangað hafði ferðaþjónustufyrirtækið Mountaineers of Iceland dröslað vesalings fólkinu þrátt fyrir veðurviðvaranir. Þegar blaðamaður Fréttablaðsins leitaði eftir skýringum hjá fyrirtækinu var honum sagt að grjóthalda kjafti. Skömmu síðar mætti rekstrarstjóri fyrirtækisins í viðtal á Bylgjunni þar sem h ann bæði baðst afsökunar vegna ákvörðunar fyrirtækisins og reyndi á sama tíma að verja hana. Því sko, þeir ætluðu að vera búnir með ferðina áður en veðrið versnaði. Því eins og allir vita eru veðurspár nákvæmar upp á mínútu. Síðan ætluðu þeir helst að sleppa því að kalla út björgunarsveitirnar því það ætti að sjálfsögðu að vera seinasta úrræðið. Á meðan máttu ferðamenn gera sér að góðu að hanga úti í frostinu fram yfir miðnætti. En engar áhyggjur, fyrirtækið hefur ákveðið að rannsaka sig sjálft, því það er alltaf farsæl lausn á svona vanda. Væri ekki réttara að stjórnvöld tæku til skoðunar að setja reglur um svona ferðir sem kveða á um fortakslausa skyldu til að aflýsa eða greina viðskiptavinum með fullnægjandi hætti fyrir þeirri áhættu sem þeir eru að taka, þegar veðurspáin blessaða hefur gefið fulla ástæðu til.