Maður hefur verið dæmdur fyrir að ráðast á þáverandi kærustu sína á heimili hennar, úðað úr úðavopni á hana og sprautað úr slökkvitæki. Mánuði seinna braut hann sjónvarp á heimili hennar og kommóðu.

Þetta kemur fram í dómi yfir manninum í Héraðsdómi Reykjavíkur sem féll á mánudag, 16. mars.

Maðurinn var dæmdur fyrir þrjú atvik, það er tvær líkamsárásir og eignaspjöll, gegn konunni á heimili hennar á tímabilinu 25. nóvember árið 2023 til 29. mars árið 2024.

Hafi hann meðal annars hrint konunni í rúm, tekið hálstaki og úðað á hana úr úðavopni og slökkvitæki. Hlaut hún marbletti víða um líkamann og sprungna vör.

Lögregla var kölluð til þegar málin komu upp en hann var þá farin úr íbúðinni. Voru munir á rúi og stúi og ummerki um átök og áfengisneyslu á staðnum. Í eitt skiptið hafi kærastinn veist að henni vegna þess að hún hafi talað við vin hans og hann orðið afbrýðisamur.

Maðurinn bætti konunni eignatjónið og var það virt honum til málsbóta. En engu að síður var hann dæmdur fyrir tvær líkamsárásir og eignaspjöll. Á móti því kom hins vegar að brotin voru gegn kærustu hans, sem sagt heimilisofbeldi.

Var refsingin ákveðin 2 mánaða fangelsisdómur skilorðsbundinn til tveggja ára. Var honum jafn framt gert að greiða konunni 400 þúsund krónur í bætur og 600 þúsund í málskostnað. Einnig sínum eigin verjanda 1,2 milljónir í málsvarnarlaun.