Eldur kom upp í flugmóðurskipinu Gerald R. Ford og eyðilögðust káetur sjóliða. Skipið hefur verið í Miðausturlöndum til að taka þátt í stríði Bandaríkjanna og Ísraelsmanna gegn Írönum. Nú þarf að sigla því til Krítar til viðgerðar.
Óhætt er að segja að stríðsrekstur Donald Trump Bandaríkjaforseta í Íran haldi áfram að ganga brösuglega. Stríðið hefur dregist á langinn, amerískir dátar halda áfram að falla, birgðaflutningar um Hormússund er stopp og árásir eru gerðar á bandarískar herstöðvar og innviði bandamanna í Persaflóanum. Þá hafa hefðbundnir bandamenn Bandaríkjanna í Evrópu, Asíu og Ástralíu neitað að koma til aðstoðar, enda var ekkert samráð haft við þá um stríðið.
Enn eitt áfallið bættist við þegar eldur kom upp í Gerald R. Ford, risavöxnu flugmóðurskipi Bandaríkjahers, undan ströndum íran.
Skipið kom rakleitt frá stríði Bandaríkjanna í Venesúela til Íran og hefur verið á sjó í níu mánuði. Áður hefur verið greint frá því að skipverjar séu um það bil að bugast og margir þeirra hyggist ekki halda áfram í sjóhernum eftir þennan túr.
Mórallinn um borð versnaði enn þegar eldurinn kom upp eins og segir í frétt breska blaðsins Independent um málið. Eldurinn kviknaði í þvottarými skipsins og tók marga klukkutíma að ná niðurlögum á honum.
Tveir sjóliðar slösuðust í eldsvoðanum og káetur um 600 sjóliða eyðilögðust. Hafa þeir þurft að sofa á dýnum á gólfinu eða ofan á matarborðum síðan. Um 200 sjóliðar þurftu að fá meðferð vegna reykeitrunar og fljúga þurfti öðrum hinum slasaða á sjúkrahús.
Þrátt fyrir að stýri eða vélarkerfi skipsins hafi ekki skemmst þá er ljóst að skipið er ekki lengur hæft til þess að stunda hernað í. Þarf það að sigla því til Krítar í Miðjarðarhafinu til viðgerðar. Ekki er vitað hversu langan tíma það mun taka en ljóst er að Gerald R. Ford verður ekki notaður í hernað í bráð.
