Þyrluflug á Reykjavíkurflugvelli hefur margfaldast á aðeins fimm árum og flestar ferðirnar eru annað hvort útsýnis eða leiguflug. Samkvæmt mælingum nær hávaði yfir miðbæ Reykjavíkur og inn í Kópavog.
Þetta kemur fram í svari Eyjólfs Ármannssonar, innviðaráðherra, við fyrirspurn Rögnu Sigurðardóttur, þingmanns Samfylkingarinnar. En hún spurði um þyrluflug á vegum einkaaðila og einkaþotur á Reykjavíkurflugvelli.
Árið 2019 voru hreyfingar þyrla á Reykjavíkurflugvelli samtals 5.811 eins og kemur fram í fylgiskjali svarsins. Þar af 994 hjá vélum Landhelgisgæslunnar. Það gera 8,1 prósent af öllum hreyfingum á vellinum.
Árið 2024 voru hreyfingarnar orðnar 13.156 talsins, eða 29,1 prósent, en hreyfingar þyrla Landhelgisgæslunnar voru nokkurn vegin jafn margar og áður. Sem sagt fjölgunin er öll í einkaflugi, útsýnis og leiguflugi.
Þá kemur einnig fram að leiguflug flugvéla hafi aukist mikið á vellinum. Það er farið úr 6.296 hreyfingum árið 2015 í 12.291 árið 2024. Hlutfallið hefur hækkað úr 9 prósentum í 30 prósent á tíu árum.
Í svarinu er einnig birt svokallað hávaðakort, sem unnið var af verkfræðistofunni EFLU árið 2021. Á því sést að hávaðinn nær ekki aðeins yfir svæði Reykjavíkurflugvallar heldur norður eftir öllum miðbæ Reykjavíkur og út að Hörpu. Einnig til austurs yfir Nauthólsvíkina og suður í Kópavog.
Reykjavíkurborg, Kópavogsbær og fleiri hafa óskað eftir því að þyrluflugi einkaaðila verði fundinn annar staður. Í svari Eyjólfs kemur fram að þetta sé til skoðunar.
„Samtal hefur átt sér stað milli Isavia innanlandsflugvalla og Samtaka sveitarfélaga á höfuðborgarsvæðinu (SSH) um skoðun á möguleikum þess að útbúa aðstöðu fyrir þyrlur á jaðri höfuðborgarsvæðisins. Málið var rætt á vettvangi SSH með skipulagsfulltrúum sveitarfélaganna en ekki liggur fyrir niðurstaða í málinu,“ segir þar. Reykjavíkurborg hefur samþykkt bann við flugi einkaþota og þyrla á vellinum.
Einnig kemur fram að í raun beri engum skylda að finna þessu þyrluflugi annan stað. „Það er einkum á ábyrgð þeirra sem áhuga hafa á að þyrluflug fari úr Vatnsmýrinni að finna og bjóða rekstraraðilum upp á annan valkost. Reykjavíkurborg og ríkið hafa beitt sér í þessu máli án niðurstöðu,“ segir í svarinu.
Ekki kemur fram hversu mikið af hávaðanum komi frá einkaþotum. Hávaðinn blandast inn í aðra flugumferð. Áætlunarflug hafi hins vegar minnkað á vellinum og þar með heildarhreyfingar. Heildarhreyfingar voru 70.793 árið 2015 en eru 41.537. Sem sagt flug, og þar með hávaði hefur minnkað, en einkaflug er orðinn stærri hluti af því.
Hávaði einkaþota og þyrla hefur angrað marga íbúa Hlíða, Miðbæjar, Vesturbæjar Reykjavíkur og Kársneshverfis í Kópavogi. Á síðasta ári voru stofnuð samtökin Hljóðmörk sem beita sér fyrir að draga úr það sem þau kalla „óþarfa flugumferð“ á Reykjavíkurflugvelli. Það er annað flug en áætlunarflug, sjúkraflug og flug Landhelgisgæslunnar.
