Gistiheimilinu Langahlíð Guesthouse á Hellu hefur verið lokað. Eigandi hússins hefur birt tilkynningu á ensku utan á húsinu þar sem þetta kemur fram. Þar segir að vegna óvenjulegra og óviðráðanlegra aðstæðna sé húsinu lokað. Haft hafi verið samband við Booking.com sem viti af stöðunni. Beðist er velvirðingar á vandræðum sem þetta kann að skapa.
Undir þetta skrifar Skúli K Skúlason fyrir hönd eigenda hússins. Hann segir í samtali við DV að þeir sem bókað hafi gistingu í Lönguhlíð í gegnum Booking.com fái endurgreiðslu. Hann vill að öðru leyti ekki tjá sig um málið en vísar í tilkynninguna.
Rekstraraðili Lönguhlíðar Guesthouse er þekktur áhrifavaldur og rappari, Saga B, öðru nafni Berglind Saga Bjarnadóttir.
Samkvæmt heimildum DV hefur hún boðið upp á bókanir beint í gegnum sig á hagstæðari kjörum en fást í gegnum Booking.com. Kona ein bókaði í janúar síðastliðnum allt gistiheimilið um næstu helgi og greiddi helming verðsins fyrirfram, eða 280 þúsund krónur. Ætlaði hún að halda upp á sextugsafmæli sitt á staðnum og bókaði gistinguna fyrir afmælisgesti. Gerðist þetta í gegnum tölvupóstsamskipti sem gengu greiðlega. Þegar konan hafði síðan samband við Sögu aftur í lok maí bárust engin svör. Slökkt er á farsíma Sögu og Reykjavík Guesthouse og hún svarar ekki tölvupóstum. Ekkert bendir til að konan sem tók gistiheimilið á leigu fái féð endurgreitt.
Ekki liggur fyrir hvort fleiri viðskiptavinir eigi inni fjármuni hjá Lönguhlíð Guesthouse vegna beinna bókana með fyrirframgreiðslu.
DV náði ekki samband við Sögu við vinnslu fréttarinnar.
Á vefnum Booking.com kemur Langahlíð Guesthouse upp sem gistikostur en ekki er þó hægt að bóka gistingu þar lengur í gegnum síðuna.
