Nýr rússíbani í Bandaríkjunum er sagður vera svo skelfilegur að hvorki þeir hugdjörfustu né fífldjörfustu þori að stíga fæti inn í hann. Rússíbaninn aftengist brautinni.

Greint er frá þessu í breska blaðinu The Daily Mail.

Rússíbaninn er staðsettur í skemmtigarðinum Cedar´s Point í bænum Sandusky í Ohio fylki. Bærinn er þekktur sem rússíbanahöfuðborg heimsins enda eru þar hvorki fleiri né færri en 18 stórir rússíbanar.

Téður rússíbani hefur fengið heitið „Siren´s Curse“, sem myndi titlast sem bölvun sírenunnar á íslensku. Er honum lýst sem hæsta, lengsta og hraðasta rússíbana í gervallri Norður Ameríku. Er gestum „steypt ofan í hyldýpið“ þegar þeir flýja undan „ópum sírenunnar.“ Er það vísun í goðsagnaveru sem sögð er lifa í stöðuvatninu Erie, einu af vötnunum miklu í miðvesturríkjunum.

Á heimasíðunni er sagt að gestir fái að upplifa algjört þyngdarleysi í þrettán skipti í rússíbananum og tvisvar fari hann í 360 gráðu hring.

Verstu parturinn sé hins vegar þegar rússíbaninn klífi 50 metra hæð og það líti út fyrir að rússíbaninn endi í miðju lofti. En þá fellur hann fram og tengist lóðréttri braut fyrir neðan.

Myndbönd af rússíbananum hafa farið eins og eldur í sinu um netheima og fólk er virkilega skelkað.

„Ég elska að fara í rússíbanana í Cedar´s Point en ég ætla ekki að fara í rússíbana sem er ekki tengdur alla leið,“ segir einn netverji á samfélagsmiðlinum TikTok.

„Þetta er mesta NEIBB sem ég get NEIBBAÐ,“ segir annar.

„Þetta minnir á kvikmyndina Final Destination. Hvað ef rússíbaninn heldur bara áfram fram af brúninni?,“ spyr einn hræddur.