Kolbrún Bergþórsdóttir, blaðamaður á Morgunblaðinu og landsþekktur pistlahöfundur, segir að skýr stefna Miðflokksins laði að kjósendur, sem séu hins vegar ekki vel læsir á stefnu flokksins því þeir skynji ekki grimmdina sem þar býr undir.

Þetta kemur fram í pistli hennar í Morgunblaðinu í dag. Kolbrún segir Miðflokkinn ala á útlendingaandúð og sundrungu. Slíkir flokkar hafi sótti í sig veðrið í nágrannalöndum okkar undanfarin ár og það boði ekkert gott. Kolbrún skrifar:

„Vonandi verður aldrei svo illa komið fyrir íslensku þjóðinni að hún komi Miðflokknum til valda. Við sjáum uppgöngu slíkra flokka í löndum í kringum okkur og hún er ekki af hinu góða. Þegar farið er að skipta fólki í „við“ og „hinir“ þá erum við ekki á réttri leið. Vonlítið er þó að benda Miðflokksmönnum á það. Slíkt tal flokka Miðflokksmenn sennilega sem afneitun „góða fólksins“ sem vill ekki horfast í augu við staðreyndir.“

Kolbrún segir að sem betur fer geti kjósendur hallað sér að Samfylkingunni, breiðum og öfgalausum flokki sem nálgist útlendingamál af raunsæi.

„Það er vissulega ekki eins og Samfylkingin eigi ráð við öllum vandamálum en þetta er öfgalaus flokkur sem hefur kastað frá sér leiðindunum sem einkenndu Gömlu-Samfylkinguna. Þar er talað fyrir skynsamlegri leið í útlendingamálum. Um leið og viðurkennt er að ekki sé hægt að taka við öllum er lögð áhersla á að taka vel á móti þeim sem hingað fá að koma. Fólki er ekki úthýst vegna trúar sinnar.“

Kolbrún segir mikilvægt fyrir þjóðina að hafa við völd stjórnmálaflokk sem tali fyrir mildi og mannúð og þannig flokkur sé Samfylkinging í dag. Kjósendur vilji hins vegar skýr skilaboð og það færi Miðflokkurinn kjósendum. Hins vegar:

„Jafn skýr og skilaboðin eru þá er einkennilegt hversu margir virðast ekki sjá hversu hættulegar og ómannúðlegar áherslur flokksins eru í útlendingamálum. Þar er hræðsluáróður við völd og of margir sjá ekki í gegnum hann. Eru ekki nógu læsir á skilaboðin sem flokkurinn er að senda.“