Karlmaður hefur verið dæmdur í ellefu mánaða óskilorðsbundið fangelsi fyrir kynferðisbrot og stórfellt brot í nánu sambandi gegn stjúpdóttur sinni. Brotin áttu sér stað á árunum 2018-2020 á sameiginlegu heimili þeirra í Reykjavík þegar stúlkan var 12-14 ára gömul.

Brotin áttu sér flest stað í svefnherbergi stúlkunnar eftir að hún hafði gengið til náða. Meðal annars var manninum gert að sök að hafa þyklað á kynfærum hennar innanklæða, sleikt eða reynt að sleikja á henni tærnar og fyrir að hafa fróað sér yfir henni á meðan hún lá í rúmi sínu. Eins hafði hann í eitt skiptið opnað læsingu á baðherbergishurð og horft þar á stúlkuna á nærfötunum, sem særði blygðunarsemi hennar. Loks sendi hann henni ítrekað klámfengnar ljósmyndir sem sýndu fullorðið fólk stunda kynlíf.

Maðurinn játaði sök og viðurkenndi bótaskyldu í málinu. Hann átti ekki sakaferil að baki og það ásamt játningu horfði honum til málsbóta. Dómari gat þó ekki litið fram hjá því að brotin beindust að barni, stjúpdóttur hans, á sameiginlegu heimili þeirra og fóru flest fram í svefnherbergi hennar eftir að hún hafði gengið til náða. Brotaþoli hafði engin önnur hús að vernda, en Ísland er ekki hennar föðurland. Hún hafði bara heimili sitt, móður sína og svo ákærða. Afleiðing brota ákærða var sú að stúlkan var vistuð á vegum barnaverndar utan heimilis og hefur búið hjá vandalausum síðan. Þannig hafi ákærði brotið frekarlega gegn trúnaðarskyldum sínum gagnvart stjúpdóttur sinni með ítrekaðri háttsemi sem hafi haft alvarlegar afleiðingar fyrir brotaþola, bæði félagslega og andlega. Stúlkan glímir í dag við andlega erfiðleika, meðal annars áfallastreitu og þunglyndi. Brot ákærða þóttu því sérstaklega ófyrirleitin.

Dómari gerði athugasemd við óhæfilegan drátt sem varð á rekstri málsins en skýrsla var tekin af stúlkunni í maí árið 2022 og næstu mánuði á eftir fór rannsókn málsins í aðalatriðum fram. Engu að síður lauk rannsókn ekki formlega fyrr en í júní á þessu ári og hefur engin haldbær skýring fengist á þessum drætti sem dómari telur ganga bæði gegn lögum um meðferð sakamála og meginreglu 70. gr. stjórnarskrár Íslands um réttláta málsmeðferð innan hæfilegs tíma.

Hæfileg refsing þótti því ellefu mánaða fangelsi og með hliðsjón af sakargiftum þóttu ekki forsendur til að binda refsingu skilorði. Eins var ákærða gert að greiða stúlkunni 2,5 milljónir í miskabætur.

Dómurinn féll í Héraðsdómi Reykjavíkur þann 3. október.