Veitingahúsnæði við Grandagarð 8 í Reykjavík er komið í sölu hjá fasteignasölunni Mikluborg. Veitingastaðurinn Bryggjan brugghús var síðast rekinn í húsnæðinu, en DV greindi frá því föstudaginn fyrir viku að búið væri að skella í lás á staðnum.

Sjá einnig: Skellt í lás á Bryggjunni brugghús og eigendur gjafabréfa áhyggjufullir

Fasteignin er 899,7 fm og var húsnæðið byggt árið 1947. Fasteignamat er 348.850.000 kr. og er óskað eftir tilboði.

Hægt er að ganga inn í húsnæðið frá Grandagarði að framanverðu en einnig er hægt að ganga inn frá austurhlið hússins sem er beint á móti höfninni en þar er líka útisvæði með stórum timburpalli.

Í nánari lýsingu á eigninni segir að komið er inn í flísalagt anddyri. Stór bar er fyrir miðju og til hliðar er veitingasalur og þar eru í dag bruggtæki en staðurinn er meðal annars þekktur fyrir að brugga sinn eigin bjór. Bak við barinn er fullbúið eldhús og kælar. Meðfram suðurhlið hússins er veitingasalur sem er með gluggum sem snúa út að bryggjunni og þar fyrir utan er útisvæði með stórum timburpalli. Staðurinn er fallega innréttur með vönduðum innréttingum. 

Húsnæðið hefur verið í leigu en leigusamningur er útrunninn og húsnæðið því laust til afhendingar fyrir kaupanda við kaupsamning. Öll tæki og búnaður sem er til staðar í húsnæðinu getur fylgt með í kaupunum.