Fólk á vegum húsvísku hafverndunarsamtakanna Ocean Missions fundu flöskuskeyti á ströndinni sem hafði borist yfir norðurpólinn. Glerflaskan hafði velskt í sjónum í næstum fjögur ár.
„Þetta er ótrúlegt,“ segir Belén Garcia Ovide, stofnandi og verkefnastjóri samtakanna. En flöskuskeytið fannst fyrr í sumar við strandhreinsun austan við Lundey á Skjálfanda. „Við fundum þessa glerflösku og í flöskunni var bréf. Við hjá Ocean Missions hreinsum ströndina í hverri viku á sumrin. Við reynum að verja svæðið hérna á Norðausturlandi vegna hins líffræðilega fjölbreytileika hér,“ segir hún.
Flaskan var glerflaska og inni í henni var bréf merkt Fiskveiði og hafrannsóknarstofnun Kanada í fylkinu Bresku Kólumbíu á vesturströnd landsins. Óskað var eftir því að sá sem myndi finna flöskuna svaraði spurningum og sendi til stofnunarinnar. Það gerðu Belén og félagar og fengu svar.
Kom í ljós að flaskan hafi farið ótrúlega langa leið og verið lengi í sjónum. Það er hátt í fjögur ár.
„Hún hefur komið mjög langt að, segir Belén. En flaskan var ein af 48 flöskum sem settar voru í sjóinn við Beringssund, norðan við Alaska fylki í Bandaríkjunum, í september mánuði árið 2021. Hafði hún því verið í sjónum í að minnsta kosti 3 ár og 8 mánuði.
Teiknuð var upp sennileg leið sem flaskan hafi farið miðað við hafstrauma á norðurslóðum. Flaskan hafi fyrst borist norður í átt að pólnum, en þaðan farið samferða hafís suður á bóginn Atlantshafsmegin með austurgrænlandsstraumnum til Íslands.
Ferðin hefur líklega verið um 9200 kílómetrar sem þýðir að flaskan hefur farið að meðaltali um 6,8 kílómetra á dag.
Í bréfinu frá Kanadamönnunum kom fram að þetta sé mjög mikill hraði. Það er miðað við þær rannsóknir á reki sem gerðar voru á níunda áratug síðustu aldar. Ljóst sé að hlutir komist hraðar yfir pólinn en á síðustu öld.
Belén segir að þeir hafi verið mjög þakklátir fyrir upplýsingarnar um hvar og hvenær flaskan hefði fundist. Þær væru mjög nytsamlegar í þeirra vísindarannsóknum.
„Þau báðust líka afsökunar fyrir að hafa látið okkur taka til þeirra vísinda rusl af ströndinni,“ segir hún kímin.
Ocean Missions eru frjáls félagasamtök sem stofnuð voru árið 2019 og eru með höfuðstöðvar á Húsavík. Samtökin, sem voru stofnuð af hópi vísindamanna og sæfarenda, hafa þann tilgang að vernda hafið og lífríkið í því.
Samtökin hafa stundað rannsóknir á hafinu, svo sem á örplasti, hvölum og sjófuglum. En einnig vinna þau að því að fræða fólk um mikilvægi og verndin hafsins. Frá árinu 2019 hafa samtökin verið með samning við Umhverfisráðuneytið um strandhreinsun og eru með net sjálfboðaliða sem sinna því.
