Á fundinum hélt tengdasonur Bjarna, tónlistarmaðurinn Brynjar Barkarson úr ClubDub, meðal annars ræðu sem vakti talsverða athygli.
DV greindi svo frá pistli sem Snærós skrifaði á Facebook í morgun þar sem hún kom móður sinni, lögfræðingnum og lögmanninum fyrrverandi Helgu Völu Helgadóttur til varnar.
„Ein þrálátasta lygin sem vellur upp út rasistum landsins er sú að mamma mín hafi beinan fjárhagslegan hag af því að til Íslands komi hælisleitendur. Það líður ekki sá dagur að ég lesi ekki komment um þetta kjaftæði, og nýverið þurfti ég að leiðrétta bullið þegar það kom upp í fjölskylduspjalli vinkonu minnar,” sagði Snærós meðal annars en hún deildi skjáskoti af ummælum sem Brynjar lét falla um einmitt þetta um helgina.
Í lok pistilsins sagði hún síðan:
„Við Bjarna Benediktsson vil ég segja: Settu tappa í tengdasoninn. Hann er að sverta ímynd fjölskyldu þinnar og verða ykkur til stórfelldrar skammar.“
Sjá einnig: Snærós þreytt á lyginni um móður sína og segir Bjarna Ben að setja „tappa í tengdasoninn“
Elliði er ekki sáttur við að Bjarni skuli vera dreginn inn í málið. Hann segir í stuttri færslu á Facebook-síðu sinni:
„Mikið afskaplega er þetta óviðeigandi. Það er ætíð ömurleg lágkúra að veitast að fólki vegna fjölskyldutengsla. Það er sérstaklega skaðlegt í stjórnmálum. Það er sínu verra þegar gerðar eru árásir á fólk vegna tengsla við fyrrverandi stjórnmálafólk. Svo er það sérstakt rannsóknarefni hvað vinstra fólk á Íslandi leyfir Bjarna Ben að búa leigufrítt í höfðinu á sér.”
Í athugasemdum er Elliði spurður að því hvort það sé í góðu lagi að herja með lygum og þvælusögum á Helgu Völu. Elliði svarar því ákveðið og segir:
„Hvaða þvæla er þetta? Er ekki hægt að leiðrétta rangindi öðruvísi en að blanda tengdaföður þessa manns í umræðuna. Er vinstrafólki alveg fullkomlega ómögulegt að vera málefnalegt? Teljið þið ætíð rétt að bregst við gagnrýni með því að beina athyglinni að einhverju öðru sem er líka neikvætt, í stað þess að takast á við gagnrýnina sjálfa (Whataboutism).“
