Pólverjar á Íslandi kusu á allt annan hátt en Pólverjar í öðrum Vestur-Evrópulöndum í fyrstu umferð forsetakosninganna sem fram fóru í gær. Öfga hægri maður er vinsælastur hjá Pólverjum á Íslandi.
Öfga hægrimaðurinn Slawomir Mentzen var efstur í íslensku kjördeildinni og hlaut 28,5 prósent atkvæða. Alls kusu 5.165 í fyrstu umferðinni en heildarfjöldi Pólverja á Íslandi er 22.693 samkvæmt tölum Hagstofunnar.
Mentzen vill meðal annars draga Pólland út úr Evrópusambandinu, hætta loftslagsaðgerðum, loka landamærunum og banna þungunarrof jafn vel þó um nauðgun sé að ræða.
Í öðru sæti á Íslandi hafnaði Rafal Trzakowski með 20,35 prósent. Trzakowski er Evrópusinnaður miðjumaður sem vann fyrstu umferðina naumlega. Fékk hann alls 31,36 prósent atkvæða en annar hægri öfgamaður, Karol Nawrocki sem studdur er af flokknum Lög og réttlæti, hlaut 29,54 prósent. Mentzen hlaut 14,8 prósent og hafnaði í þriðja sæti.
Í pólskum miðlum er sagt að gott gengi Mentzen og slæmt gengi Trzakowski á Íslandi sé einsdæmi í kjördeildum í Vestur Evrópu. Almennt hlaut Trzakowski glimrandi kosningu hjá brottfluttum Pólverjum.
Trzakowski hlaut 35,91 prósent hjá Pólverjum í Bretlandi, 37,68 prósent í Írlandi, 40,86 prósent í Þýskalandi, 29,38 prósent í Hollandi, 36,05 prósent í Belgíu, 49,70 prósent á Spáni og 41,79 prósent í Frakklandi.
Athygli vekur að Nawrocki hlaut yfirleitt mjög slæma kosningu á meðal brottfluttra Pólverja í Evrópu og hafnaði oft í fjórða eða fimmta sæti. Á meðal Pólverjar í Bandaríkjunum hlaut hann hins vegar 42,3 prósent.
