Fyrrverandi Arsenal-vængmaðurinn Nicolas Pépé fékk heldur betur óvænta afmælisgjöf frá kærustunni sinni, bandarísku fullorðinsstjörnunni Teönnu Trump, er hann fagnaði 30 ára afmæli sínu, en hún gaf honum lúxusferð að virði um 23 þúsund punda (um 30 þúsund dollara).
Teanna, sem heitir réttu nafni Keanna Nichele Jones, hefur verið í sambandi með Pépé síðan árið 2024. Í nýlegu viðtali við YouTube-rásina Just Riadh sagðist hún þó hafa þurft að verja sig fyrir ásökunum um að hún væri með fótboltamanninum vegna peninga.
„Ég er ekki með honum út af peningum,“ sagði hún.
„Ég þarf ekki á peningunum hans að halda, ég á mína eigin peninga. Fyrsta árið sem við vorum saman borgaði ég fyrir allar flugferðirnar mínar til Spánar, á tveggja vikna fresti. Ég keypti öll flugin því ég vildi sýna að ég væri ekki að nýta hann.“
Hún bætti við að Pépé greiði ekki neitt fyrir hana og að hún hafi sjálf skipulagt dýru afmælisferðina í maí. „Hann varð 30 ára, svo ég hugsaði: ‘Fjárhagsáætlunin er 30.000 dollara.’ Hann vissi ekki einu sinni hvert við vorum að fara.“
Samband þeirra komst í hámæli í desember 2024 þegar þau birtu fyrstu sameiginlegu myndina á samfélagsmiðlum. Teanna, sem sló í gegn í fullorðinsbransanum aðeins 18 ára gömul, hefur ekki unnið fyrir neina kvikmyndasíðu síðan 2020 og einbeitir sér nú að eigin efnisgerð.
Pépé, sem kostaði Arsenal 72 milljónir punda þegar hann kom frá Lille árið 2019, náði aldrei að standa undir væntingum og lék 80 leiki í ensku úrvalsdeildinni áður en hann yfirgaf félagið 2023. Hann spilar nú með Villarreal eftir stopp í Trabzonspor.
