Með ráðningu Jóns Viðars er markmiðið að efla starf og skipulag almannavarna höfuðborgarsvæðisins. Birgir Finnsson varslökkviliðsstjóri verður settur slökkviliðsstjóri á meðan.
Þetta kemur fram í tilkynningu frá slökkviliðinu.
Jón Viðar hefur starfað sem slökkviliðsstjóri á höfuðborgarsvæðinu og samhliða því verið framkvæmdastjóri almannavarnanefndar höfuðborgarsvæðisins í yfir 20 ár.
„Ég segi stundum að slökkviliðsstjórinn hafi verið sýnilegri út á við, en starfið sem framkvæmdastjóri almannavarnanefndar er ekki síður mikilvægt. Nú fæ ég tækifæri til að sinna því af fullum þunga á næsta ári, sem er virkilega ánægjulegt.“ segir Jón Viðar í tilkynningu sem barst fjölmiðlum í morgun.
Almannavarnanefnd höfuðborgarsvæðisins (AHS) er sameiginleg nefnd þeirra sjö sveitarfélaga sem mynda höfuðborgarsvæðið. Meginhlutverk hennar að efla samstarf og samhæfingu sveitarfélaganna þannig að þau séu sem best undirbúin að sinna skyldum sínum á öllum stigum almannavarna og veita íbúum grunnþjónustu sem er svo mikilvæg fyrir okkar daglega líf svo ekki sé talað um á hættustundu.
„Covid-faraldurinn og atburðir í tengslum við eldsumbrot á Reykjanesskaga hafa sýnt nauðsyn þess að almannavarnir séu vel skipulagðar. Gott samstarf og samhæfing skilaði góðum árangri í covid-faraldrinum. Jón Viðar sem framkvæmdastjóri almannavarnanefndar leiddi þetta samstarf ásamt neyðarstjórnum hvers sveitarfélags í góðu samstarfi við ríkisstofnanir. Nú viljum við efla þetta starf enn frekar og teljum Jón Viðar rétta manninn til að leiða þá vinnu og tryggja að höfuðborgarsvæðið sé í stakk búið til að takast á við þær áskoranir sem upp kunna að koma,“ segir Heiða Björg Hilmisdóttir, formaður stjórnar almannavarnarnefndar höfuðborgarsvæðisins, í tilkynningunni.
