Þrír þingmenn Sjálfstæðisflokksins hafa lagt fram á Alþingi frumvarp til breytinga á lögum um þjóðfána Íslendinga og ríkisskjaldarmerkið. Kveður frumvarpið á um að íslenska fánanum verði flaggað við Alþingishúsið og Stjórnarráðshúsið daglega.
Nánar tiltekið er þarna um að ræða ríkisfánann sem einnig er kallaður tjúgufáninn. Samkvæmt vef stjórnarráðsins er hann eilítið frábrugðinn hinum almenna íslenska þjóðfána. Þar er ríkisfánanum lýst með eftirfarandi hætti:
„Hann er að því leyti frábrugðinn hinum almenna þjóðfána, að ytri reitir hans eru þrefalt lengri en stangarreitirnir og klauf er upp í hann að framan, skorin eftir beinum línum, sem dregnar eru frá ytri hornum fánans inn að miðlínu hans á þann hátt að þær skera innjaðra ytri reitanna, þar sem saman koma 4/7 ytri og 3/7 innri hluta lengdar þeirra. Þar sem nefndar línur nema við arm rauða krossins er hann þverskorinn.“
Fyrsti flutningsmaður frumvarpsins er Guðrún Hafsteinsdóttir en meðflutningsmenn eru Diljá Mist Einarsdóttur og Vilhjálmur Árnason en hin tvö síðarnefndu styðja framboð hinnar fyrrnefndu til formanns Sjálfstæðisflokksins.
Frumvarpið kveður á um að ríkisfánanum verði flaggað við Alþingishúsið og Stjórnarráðið frá klukkan 8 að morgni til klukkan 21 á kvöldin og að fánarnir verði lýstir upp í skammdeginu.
Þingmennirnir þrír taka málið í arf frá Birgi Þórarinssyni, fyrrum þingmanni Sjálfstæðisflokksins, sem flutti það á fjórum löggjafarþingum án þess að það næði fram að ganga. Greinargerð þingmannanna þriggja með frumvarpinu er því afar stutt og þar eru ekki reifuð nein rök fyrir þessari breytingu en með því að vísa í frumvarp Birgis er væntanlega byggt á sömu röksemdafræslu og í greinargerðum hans.
Í frumvarpi þingmannanna þriggja hefur þó verið gerð sú breyting frá frumvarpi Birgis að ekki er lengur kveðið á um að ríkisfánanum skuli flaggað við byggingu Hæstaréttar Íslands, embættisbústað forseta Íslands og skrifstofu hans í Reykjavík. Í greinargerðinni segir að þessar breytingar hafi verið gerðar á frumvarpinu með tilliti til athugasemda sem hafi borist.
