Í morgun var þingfest fyrir Héraðsdómi Reykjaness mál sem héraðssaksóknari hefur höfðað á hendur manni fyrir sérstaklega hættulega líkamsárás.

Í nafnhreinsaðri ákæru segir að maðurinn hafi fimmtudaginn 29. apríl árið 2021 ekið bíl í tvígang aftan á annan bíl sem í voru ökumaður og farþegi. Bíllinn sem ekið var á tjónaðist en ökumaður hlaut eymsli og tognun í hálsi, eymsli í hnakkafestingum og tognun í lendhrygg.

Segir í ákærðu að ákærði hafi með framferði sínu stofnað á ófyrirleitinn hátt lífi og heilsu fólksins í augljósan háska.

Brotið er sagt varða við aðra málsgrein 218. gr. almennra hegningarlaga, en þar segir:

„Nú hlýst stórfellt líkams- eða heilsutjón af árás eða brot er sérstaklega hættulegt vegna þeirrar aðferðar, þ. á m. tækja, sem notuð eru, svo og þegar sá, er sætir líkamsárás, hlýtur bana af atlögu, og varðar brot þá fangelsi allt að 16 árum.“

Ökumaðurinn í bílnum sem varð fyrir ákeyrslu ákærða krefst miskabóta upp á tvær milljónir króna.