Hvalfjarðargöngum hefur verið lokað tímabundið út af hjólreiðamanni sem hafði hjólað inn í göngin. Þetta kemur fram á upplýsingavef Vegagerðarinnar, umferdin.is, en tilkynnt var um lokunina 17:31. Tæpu korteri síðar var tilkynnt að göngin væru opin á ný og vegfarendur beðnir að passa bilið milli ökutækja.

Sambærilegt mál kom upp seint í maí þar sem göngunum var lokað um hríð á meðan lögregla fylgdi hjólreiðamanni út úr göngunum á meðan aðrir vegfarendur þurftu að bíða, þar með talið Strætó. Sjónarvottur furðaði sig þá á því að lögregla hefði kosið að fylgja hjólreiðamanninum eftir á meðan hann hjólaði sína leið, fremur en að skutla honum út og gera honum að sækja hjólið við betra tækifæri.

Að sögn lögreglunnar á Vesturlandi  í maí var ekki talið ráðlegt að skilja hjólið eftir í göngunum. Tilfelli sem þessi væru fátíð og ekki væri því til venjur eða verkferlar um afgreiðslu þessa mála.

Hjóla má í gegnum öll göng á Íslandi nema Hvalfjarðargöng og Vaðlaheiðargöng. Hjólreiðamenn hafa í gegnum árin furðað sig á þessu banni, en það má rekja til öryggismála þar sem hjól eigi erfitt með að halda meðalhraða í gegnum göngin sem er um 70 km/klst. Umferð gangandi og hjólandi vegfarenda, umferð reiðmanna og rekstur búfjár er bannaður í göngunum nema með sérstöku leyfi lögreglustjóra.