Forsetarnir ræddu eitt og annað en að vonum bar málefni Úkraínu hátt. Þeir lögðu áherslu á að Frakkland og Bandaríkin séu náin bandalagsríki og í kjölfarið ræddu þeir málefni Úkraínu.
„Við vitum hvað gerist ef Pútín tekst að leggja Úkraínu undir sig. Og við vitum að Pútín mun ekki láta staðar numið við Úkraínu,“ sagði Biden að sögn erlendra fjölmiðla.
„Þetta snýst um miklu meira en Úkraínu. Allri Evrópu verður ógnað og það munum við ekki láta gerast,“ sagði hann síðan.
Á föstudaginn hét hann Úkraínu nýjum hjálparpakka að andvirði 225 milljóna dollara. Um leið bað hann úkraínsku þjóðina afsökunar á margra mánaða seinkun á síðasta hjálparpakka en hann sat fastur í fulltrúadeild þingsins vegna andstöðu þingmanna Repúblikana.