Hannes S. Jónsson, framkvæmdastjóri KKÍ, var í viðtali í hlaðvarpsþættinum Mín skoðun með Valtý Birni Valtýssyni í gær þar sem hann sagði mörg dæmi vera um að fjölskyldur leikmanna þurfi að greiða mörg hundruð þúsund krónur svo að leikmenn geti spilað fyrir hönd Íslands á mótum erlendis. Staðan væri þannig að KKÍ hefði einfaldlega ekki efni á að standa straum af kostnaðinum við verkefnin.
Sumir þurfa því að fara óhefðbundnar leiðir til að fjármagna ferðalög sín og einn þeirra er Daníel Ágúst Halldórsson sem birti færslu í íbúahópi Grafarvogsbúa á Facebook.
Daníel Ágúst var valinn í lokahóp U20 ára landsliðsins í fyrradag en liðið býr sig nú undir Norðurlandamótið í Sodertalje í Svíþjóð í lok þessa mánaðar og svo er framundan Evrópumótið í Póllandi um miðjan júlí.
„Kæru nágrannar. Ég er að safna upp í kostnað á U20 landsliðsferðum í körfubolta sem er umtalsverður þrátt fyrir niðurgreiðslu KKÍ eða 560.000 kr. fyrir mig. Ef þið eigið poka af dósum eða flöskum sem þið viljið styrkja mig með eða eruð á vinnustað sem vill styrkja mig með poka af dósum eða flöskum þá endilega verið í sambandi,“ sagði Daníel sem er einn okkar efnilegasti leikmaður í körfubolta.
Margrét Elíasdóttir birti síðan athyglisverða færslu á Facebook í gærkvöldi en Margrét á þrjú börn sem leikið hafa með yngri landsliðum Íslands. Hún er móðir bræðranna Martins og Arnórs Hermannssonar og þá er dóttir hennar Anna Margrét í 18 ára landsliðinu. Benti hún á að landsliðsverkefni sumarsins hjá Önnu kostuðu hana 660 þúsund krónur.
„Staðan var eins þegar að Martin og Arnór fóru í gegn um sín landsliðsár. Mikið óska ég þess að þetta breytist, við erum farin að missa afrekskrakka úr landsliðum vegna kostnaðar sem er galið!,“ sagði hún.
Falur Harðarson, fyrrverandi landsliðsmaður í körfubolta, tjáði sig um þetta undir færslu Margrétar.
„Þetta hefur ekkert breyst frá því ég fór í mína fyrstu landsliðsferð með 15 ára liði til Svíþjóðar fyrir rúmum 40 árum. Ráðamönnum og konum hefur alla tíð vantað getu og vilja til að koma þessu í betra horf! Ég spilaði yfir 100 A-landsleiki fyrir Ísland á 12 ára tímabili og aðeins eitt árið hafði ég atvinnu af því að spila körfubolta, en hin árin var ég í vinnu eða námi. Ég tók það einu sinni saman að eftir að ég lauk námi notaði ég 8 vikur af mínu sumarfríi til að spila fyrir Ísland.“
