Auglýsingastofan Sahara vann á dögunum til hinna virtu Netty-verðlauna í flokknum Digital Marketing (Best Cross-Channel Campaign (Hospitality)), fyrir stafrænu markaðsherferðina „Where Luxury Meets Tradition“ fyrir Torfhús Retreat.

Netty-verðlaunin eru meðal þeirra virtustu í stafræna heiminum og var komið á fót til að veita viðurkenningar fyrir árangur í stafrænni markaðssetningu og heiðra fólk og fyrirtæki í fremstu röð í meira en 100 mismunandi flokkum. Verðlaunahafar eru valdir á grundvelli fjölmargra þátta, þar er m.a. horft til hugmyndaauðgi, nýsköpunar, tæknilegrar getu og heildarárangurs á viðkomandi sviði. Netty-verðlaun setja þannig skýr viðmið um afburða vinnubrögð sem skila hámarksárangri.

„Það er ótrúlegur heiður fyrir okkur að hljóta þessa viðurkenningu frá Netty Awards. Starfsfólkið okkar hefur lagt þrotlausa vinnu og mikinn sköpunarkraft í herferðina fyrir Torfhús Retreat. Þessi verðlaun eru því til vitnis um dugnað þeirra og eldmóð og ég gæti ekki verið stoltari,“ segir Jón Gísli Ström, Stafrænn markaðsstjóri og Partner hjá Sahara. 

Where Luxury Meets Tradition er afrakstur af samspili allra deilda hjá Sahara, allt frá vefsíðuhönnun og strategíu til framleiðslu markaðsefnis og umsjónar með herferðinni. Hvert smáatriði er vandlega ígrundað og öll nálgun var gagnadrifin frá upphafi til enda. Á þann hátt tókst að hámarka allar niðurstöður og nýta birtingafé á sem hagkvæmastan hátt. Árangur herferðarinnar kom strax fram, áhugi á Torfhús Retreat óx dag frá degi og bókanir fóru fram úr öllum væntingum.

„Eigendur Torfhús Retreat veittu okkur fullkomið frelsi til að hanna herferðina frá upphafi til enda. Við berum mikla virðingu fyrir þeirri ábyrgð sem því fylgir því það er ekki sjálfgefið að fá frjálsar hendur til að vinna verkefni fyrir fyrirtæki sem býður slíka háklassa vöru. Það gerði okkur kleift að víkka rammann og skapa eitthvað alveg nýtt og við þökkum fyrir það traust sem okkur var sýnt. Við einsettum okkur að gera herferð sem sýnir hvernig lúxus og hefð er blandað saman á óaðfinnanlegan hátt og verðlaunin eru staðfesting á mikilli vinnusemi, frumlegri hugsun og þeim eldmóði sem við lögðum í verkið ,“ segir Eva Þorsteinsdóttir, viðskiptastjóri og partner hjá Sahara.