Það vakti athygli margra í gær þegar þríeykið, sem var áberandi í fréttum í kringum kórónuveirufaraldurinn, birtist í myndbandi á stuðningsmannasíðu Katrínar á Facebook.
Þórólfur segir til dæmis að Katrín hafi leitt þjóðina í gegnum faraldurinn af stillingu og sameinað hana í baráttunni gegn veirunni. Kári og Víðir tóku í svipaðan streng.
Steinunn Ólína virðist ekki hafa miklar áhyggjur af stuðningsyfirlýsingum þremenninganna og er raunar frekar hlátur í huga.
„Þetta er það fyndnasta og örvæntingarfyllsta sem fram hefur komið. Þrír karlar úr Efri- deild kallaðir á dekk. ,,Veljið rétt annars fer illa!” ,,Treystið okkur til að vita betur!”
Það er ekkert að óttast, trúið mér. Við erum fullfær um að hugsa og taka sjálfstæðar ákvarðanir sjálf,“ segir hún og bætir við:
„Ég minni á lag þursaflokksins, Pínulítill karl, sem hefði nú bætt falska hljóðmynd þessara myndbanda til muna. Ef þið hlustið á lagið takið þá eftir hvernig okkar ástkæri stórsöngvari Egill Ólafsson hlær með sjálfum sér þegar hann syngur lagið. Það er óborganleg túlkun enda er Egill Ólafsson stórveldi.“
