Meirihluti íbúa Múlaþings eru jákvæðir í garð komu skemmtiferðaskipa. 68 prósent telja að koma skipanna hafi jákvæð áhrif á sinn byggðakjarna.
Þetta kemur fram í könnun sem Prósent gerði fyrir sveitarfélagið Múlaþing.
Aðeins 12 prósent telja að koma skemmtiferðaskipa hafi neikvæð áhrif á sinn byggðakjarna. 21 prósent svöruðu hvorki né.
Jákvæðastir voru íbúar á Borgarfirði eystra. 86 prósent þeirra töldu skemmtiferðaskip hafa jákvæð áhrif. 81 prósent Seyðfirðinga, 74 prósent Djúpavogsbúa og 67 prósent Egilsstaðabúa.
Íbúar í Fellabæ skera sig úr í könnuninni. Aðeins 32 prósent þeirra eru jákvæðir í garð skemmtiferðaskipa en 59 prósent svöruðu hvorki né.
Karlar voru jákvæðari í garð komu skipanna en konur. Einnig var eldra fólk, það er 55 ára og eldra, jákvæðara en yngra fólk.
Þegar einstaka þættir varðandi komu skemmtiferðaskipa var greind kom í ljós að flestir telja þær hafa jákvæða áhrif á verslun og þjónustu í sínum byggðakjarna. Þar á eftir kemur jákvæð áhrif á efnahag byggðakjarnans og fjölbreytt jákvæð áhrif. Aðeins helmingur telur hins vegar að koma skemmtiferðaskipa verði mikilvæg undirstaða fyrir efnahagslífið í sínum byggðakjarna til framtíðar.
Mengun í tengslum við skemmtiferðaskip hefur verið mikið til umræðu. Skoðanir eru mjög skiptar um mengun skipanna í Múlabyggð. 37 prósent telja skipin auki mengun en 37 prósent segja að þau geri það ekki.
Langflestir, 78 prósent, telja að það þurfi að bæta innviði til að geta tekið á móti skemmtiferðaskipunum. Flestir nefna klósettin í því samhengi, það er 67 prósent.
49 prósent nefna vegi, 48 prósent gangstéttir, 37 prósent þjónustu, 36 prósent tímastýringu yfir árið, 36 prósent sorphirðu, 33 prósent verslun og 30 prósent að draga þurfi úr mengun.
Könnunin var netkönnun gerð dagana 23. nóvember til 15. desember árið 2023. Aðeins íbúum í Múlaþingi var boðin þátttaka í könnuninni. 62 prósent svöruðu og heildarfjöldi svarenda voru 407.
