Aðspurður um hvaða mannvirki eru í hættu segir Víðir Reynisson sviðsstjóri Almannavarna við RÚV í fréttatíma kl. 10:

„Það sem er næst eru innviðir, kalda vatnið, heita vatnið og rafmagnið og Grindavíkurvegur er það sem hraunið stefnir í átt að, það er það sem er fyrst undir sýnist okkur.“

Segir hann Grindavíkurveg rofinn og lokaðan. „Það skiptir minnstu máli hvort hraun renni yfir hann þarna,“ segir Víðir og segir menn hafa meiri áhyggjur af innviðum.

Unnið var að því að bjarga vinnuvélum eftir að vinna við varnargarða var stöðvuð í nótt. „Það er búið að bjarga þeim tækjum sem var reynt að bjarga.“

Segir hann ekki hægt að útiloka að hraun renni til bæjarins. „Nú er náttúran við stjórnvölinn og við þurfum að bregðast við því sem gerist þarna. 

Ég minni á að við ætluðum að tæma bæinn á morgun vegna hættunnar af sprungunum. Sprungur hafa stækkað og nýjar myndast og varasamt að fara í þá vinnu,“ segir Víðir um hvort verði reynt að bjarga húsum í Grindavík. 

„Eins og venjulega þyrpist fólk að og vill skoða þetta. Ef menn átta sig á alvöru málsins og hvað er undir, vinsamlega gefið okkur vinnufrið til að bjarga því sem hægt er að bjarga. Við erum búin að eyða allt of miklum tíma í að vísa almenningi frá sem við hefðum getað nýtt í annað.“