Óhætt er að fullyrða að Ástralir séu slegnir eftir að einn alræmdasti morðingi landsins var skyndilega náðaður og getur nú um frjálst höfuð strokið eftir 20 ára dvöl bak við lás og slá.
Kathleen Folbigg var árið 2003 dæmd í fjörtíu ára fangelsi fyrir að hafa myrt fjögur börn sín. Málið vakti mikla athygli á sínum tíma og var Folbigg úthrópuð sem „versti fjöldamorðingi Ástralíu“ í þarlendum miðlum.
Börn Folbigg létust á tíu ára tímabili, frá 1989-1999. Frumburður hennar Caleb lést árið 1989, Patrick árið 1991, Sarah árið 1993 og að lokum Laura árið 1999. Þrjú fyrstu börnin létust þegar þau voru innan við eins árs gömul nema Laura sem var orðin 18 mánaða gömul þegar hún lést. Voru börnin upphaflega sögð hafa dáið vöggudauða en lögregla hóf rannsókn á láti fjórða barnsins sem leiddi til þess að Folbigg var ákærð.
Engar beinar sannanir fundust fyrir sekt móðurinnar en það þótti hafið yfir skynsamlegan vafa að börnin hefðu ekki dáið af náttúrulegum orsökum. Var þar meðal annars vitnað í orð breska barnalæknisins Roy Meadow sem sagði að einn vöggudauði í fjölskyldu væri sorlegur, annar væri grunsamlegur og þriðja skiptið væri morð. Þá vöktu dagbókafærslur Folbigg upp grunsemdir og virtust benda til sektar hennar og var það nóg til að dómur féll gegn henni.
Folbigg hefur grotnað í fangelsi síðan en nokkrar tilraunir voru gerðar til að taka málið upp að nýju. Það gekk eftir árið 2022 þegar að nýjar rannsóknir leiddu í ljós að dætur hennar tvær voru með stökkbreytt gen sem hefði áhrif á hjarta þeirra og gæti reynst banvænt.
Að endingu komst dómari að þeirri niðurstöðu í sumar, byggt á þessum gögnum, að náða Folbigg en sá úrskurður var svo staðfestur í vikunni. Hefur lögmaður hennar boðað skaðabótamál gegn áströlskum yfirvöldum og er talið að farið verði fram á metfjárhæðir.
