Nanna Magnadóttir, héraðsdómari við Héraðsdóm Reykjavíkur, er látin, 50 ára að aldri. Greint er frá þessu í Morgunblaðinu í dag en þar kemur fram að Nanna hafi látist á Landspítalanum þann 26. október síðastliðinn af völdum heilablóðfalls.

Nanna fæddist í Lundúnum þann 10. mars árið 1973 en eins árs flutti hún heim til Íslands ásamt foreldrum sínum og ólst þar upp.

Nanna lauk embættisprófi í lögfræði árið 1998 og hóf eftir það störf hjá Héraðsdómi Reykjavíkur sem aðstoðarmaður dómara. Þá var hún um skeið lögfræðingur hjá Umboðsmanni Alþingis.

Nanna lauk meistaragráðu í alþjóðlegum mannréttindalögum frá Svíþjóð árið 2004 og starfaði hjá Evrópuráðinu, meðal annars lögfræðilegur ráðgjafi og staðgengill forstöðumanns skrifstofu Evrópuráðsins í Kósóvó.

Hún kom víða við í störfum sínum erlendis. Hún starfaði á vegum íslensku friðargæslunnar sem ráðgjafi svæðisáætlunar UNIFEM fyrir Suðaustur-Evrópu og var þá staðsett í Serbíu. Árið 2008 fór hún aftur til Kósóvó og starfaði sem forstöðumaður skrifstofu Evrópuráðsins á vegum friðargæslunnar. Hún og fjölskylda hennar fluttu svo til Svíþjóðar árið 2009 þar sem hún var aðalráðgjafi hjá Eystrasaltsráðinu.

Fjölskyldan flutti heim 2013 og í ársbyrjun 2014 tók hún við sem forstöðumaður og formaður úrskurðarnefndar umhverfis- og auðlindamála. Í ársbyrjun 2022 var hún skipaður dómari við Héraðsdóm Reykjavíkur og gegndi hún því starfi til dauðadags.