Ökumanni var bjargað úr Markarfljóti í morgun. Þetta kemur fram í tilkynningu frá Landsbjörgu. Rétt upp úr klukkan 6 í morgun bárust björgunarsveitum á Suðurlandi boð um að bíll hefði lent í Markarfljóti. Þegar björgunarfólk kom á staðinn var ökumaður bílsins kominn út úr bílnum og hékk utan á honum. Gúmmíbátur var settur á flot á ánni og sigldi björgunarfólk að bílnum og kom tveimur að bílnum til aðstoðar. Ökumaður var einn í bílnum.

Björgunarfólkið sem komið var að bílnum gat komið ökumanni, sem er kona, upp á þak bílsins, en hún var orðin köld og nokkuð skelkuð.

Þegar yfirvofandi hætta var afstaðin var tekin sú ákvörðun að bíða komu þyrlu sem hafði verið kölluð út nokkru áður, frekar en að freista þess að koma konunni kaldri og stirðri í gúmmíbátinn.

Þyrla LHG var á staðnum rétt upp úr klukkan 7 og hífði ökumanninn upp og flutti á brott. Björgunarsveitir unnu svo að því að ná bílnum upp úr ánni, sem tókst tæpri klukkustund síðar.

Svo virðist sem ökumaður hafi farið á vegrið við brúna, þar sem það er leitt í jörð, og kastast þaðan út í ána. Straumurinn bar svo bílinn nokkuð niður ánna áður en hann stöðvaðist.