Rússneski herinn er byrjaður að fá konur, sem sitja í rússneskum fangelsum, til liðs við sig á herteknu svæðunum í Úkraínu.

Þetta kemur fram í skýrslu úkraínska hersins að sögn Sky News.  Fram kemur að þetta sé liður í tilraunum Rússa til að „fylla“ á hersveitir sínar.

„Til að bæta upp fyrir manntjónið er óvinurinn byrjaður að lokka konur, refsifanga, til að taka þátt í stríðinu,“ segir í skýrslunni þar sem kemur einnig fram að á einni viku hafi tekist að fá um 50 konur, úr fangelsi í Snizhne, til liðs við herinn. Snizhne er í hertekna hluta Donetsk. Segir í skýrslunni að konurnar hafi verið sendar til Rússlands í þjálfun.