Bílasalan Bensínlaus ehf. hefur verið úrskurðað gjaldþrota. Þetta kemur fram í Lögbirtingablaðinu í dag en þar kemur fram að héraðsdómur Reykjavíkur hafi úrskurðað félagið gjaldþrota þann 2. nóvember síðastliðinn. Frestdagur varðandi kröfur í þrotabúið miðast við 17. ágúst 2022 og er ráðgert að skiptafundur fari fram þann 30. janúar næstkomandi.
Eins og nafnið gefur til kynna sérhæfði bílasalan sig í rafbílum en forsvarsmenn félagsins voru þeir Ívar Máni Garðarsson, framkvæmdastjóri bílasölunnar, og hinn breski Jamie Clark sem báðir áttu helmingshlut í félaginu.
Í apríl var greint frá því ásökunum um stórfellda svikastarfsemi fyrirtækisins bæði frá fyrrum starfsmönnum fyrirtækisins og viðskiptavinum þess.
Í þeim hópi var meðal annars ellilífeyrisþeginn Jóhannes Þór Jóhannesson sem hafði greitt bílasölunni tæpar 8 milljónir króna fyrir nýjan Ford Mustang-bíl en ekki fengið bílinn afhentan.
Á sama tíma var greint frá því að fjórir lykilstarfsmenn bílasölunnar hefðu hætt störfum vegna þessara viðskiptahátta. Þetta voru aðstoðarframkvæmdastjóri, sölustjóri, innkaupastjóri og mannauðsstjóri fyrirtækisins. „Við vitum að stjórnendur Bensinlaus.is eru að sýna viðskiptavinum verksmiðjupantanir á bílum úti á meginlandi Evrópu sem enginn fótur er fyrir, en með eftirgrennslan vegna nokkurra svona tilvika komst ég að því að engin pöntun lá fyrir,“ sagði Jóhanna Pálsdóttir, fyrrum innkaupastjóri bílasölunnar og Gísli Gíslason, fyrrum sölustjóri bílasölunnar, staðfesti sögu Jóhönnu og sagði að hluti svikanna væri að seinka ítrekað afhendingu bílanna hér á landi.
Þá var greint frá því að framkvæmdarstjórinn Ívar Máni væri flúinn til Marbella á Spáni.
