Lögreglunni var tilkynnt um öskur og læti í íbúð í Kópavogi í gærkvöldi. Lögreglumenn fóru á vettvang og kom þá í ljós að þarna var maður að spila tölvuleik. Hann lofaði að róa sig niður.

Í Vesturbænum var tilkynnt um unglinga sem væru að fikta með eld á skólalóð. Í ljós kom að þarna voru skátar að leik. Búið var að slökkva eldinn.

Í Miðborginni datt ölvaður maður af rafskútu og hlaut áverka á andlit. Hann var fluttur á bráðamóttöku til aðhlynningar og töku blóðsýnis þar sem hann er grunaður um ölvun við akstur.

Í Mosfellsbæ varð reiðhjólamaður fyrir því óláni að hjóla á ljósastaur. Hann datt fram fyrir sig og hlaut minniháttar áverka við það.

Í Kópavogi var tilkynnt um umferðarslys og að tjónvaldur væri sofandi undir stýri. Hann reyndist ölvaður og var handtekinn og vistaður í fangageymslu.

Á Kjalarnesi var ekið á ljósastaur. Ökumaðurinn er grunaður um ölvun við akstur og var hann handtekinn og vistaður í fangageymslu.

Tveir ökumenn, til viðbótar, voru handteknir grunaður um að vera undir áhrifum áfengis og/eða fíkniefna.