DV greindi frá því í gærkvöldi að GG Sport væri búið að slíta samstarfi við leiðsögumann vegna ásakana um ofbeldi í Facebook-hópnum Fjallastelpur – umræðuhópur um útivist á Íslandi fyrir konur. Síðan sú frétt birtist í gærkvöldi hafa fleiri fyrirtæki sem voru í samstarfi við leiðsögumanninn slitið samstarfinu en auk þess hefur Vísir nafngreint manninn sem Tomasz Þór Veruson.
Tomasz er fjallaleiðsögumaður og ljósmyndari sem er nokkuð vinsæll á samfélagsmiðlinum Instagram. Þar er hann með rúmlega 15 þúsund fylgjendur en síðan fréttaflutningur af ásökununum hófst hefur hann lokað aðgangi sínum fyrir þá sem eru ekki að fylgja honum.
Í frásögn konunnar sem steig fram í Facebook-hópnum er hennar hlið málsins lýst í ítarlegum smáatriðum. „Í tvö ár var ég í ofbeldissambandi með manni sem um þessar mundir fer mikið fyrir í fjallaheiminum. Ég var beitt miklu andlegu ofbeldi sem einnig var á tímum líkamlegt og kynferðislegt,“ segir konan í upphafi færslunnar.
„Mig hefur lengi langað til að stíga fram en aldrei fundið kjarkinn fyrr en nú. Ég og aðrar konur (við erum fleiri en ein, tvær og þrjár) höfum síðustu ár þurft að horfa upp á ofbeldismann okkar taka ítrekað fyrir ný fórnarlömb ásamt því að sjá bæði andlit hans og nafn prýða hina ýmsu miðla og koma fram í auglýsingum. Slíkt vekur eðlilega upp slæmar tilfinningar, og sem dæmi í mínu tilfelli áfallastreitu. Þá hef ég einnig óttast öryggi mitt og öryggi fjölskyldu og vina og því kosið að segja mína sögu á annan hátt en opinberlega. Sem betur fer veit nú þegar fjöldi fólks hvaða mann hann raunverulega hefur að geyma.“
Önnur fyrrverandi kærasta Tomazar hefur stigið fram í athugasemdunum við færsluna. „Þetta er líka fyrrverandi kærastinn minn og ég tek undir þín orð. Viðkomandi var einnig samstarfsaðili minn um tíma og það hefur verið erfitt að burðast með þetta farg á herðunu, allra þyngsti bakpokinn á mínum ferli og hæsta fjallið að klífa,“ segir hún.
