Eigandi veitingastaðanna  Flame í Katrín­ar­túni og Bambus í Borg­ar­túni eru grunaðir um stórfelldan launaþjófnað. Þetta kemur fram í frétt Mbl.is um málið.

Fyrr í dag var send fréttatilkynning á fjölmiðla þar sem fram kom að eftirlitsmenn Fagfélaganna grunaði  tvo veitingastaði í Reykjavík um stórfelldan launaþjófnað. Í tilkynningunni var ekki greint frá nafni staðanna en þau voru opinberuð í áðurnefndri frétt Mbl.is.

Starfs­fólk veitinga­staðanna tveggja virðist að­eins hafa fengið lág­marks­laun greidd, en vinnudagur þeirra spannaði tíu til sex­tán klukku­stundir, sex daga vikunnar. Þá fengu þau engin vakta­á­lög, enga yfir­vinnu, or­lof eða annað sem gengur og gerist á ís­lenskum vinnu­markaði og hefur verið samið um. Eftir­lit­steymi Fag­fé­laganna bauð fólkinu að komast út úr þeim að­stæðum sem það var í, en allir starfs­menn sem voru á vakt þann daginn þáðu boðið.

Við nánari eftir­grennslan kom svo í ljós að starfs­menn veitinga­staðanna bjuggu í íbúð á vegum at­vinnu­rek­enda en var boðið að fara í íbúð á vegum stéttar­fé­lags, sem þeir þáðu.

Í ljósi þessa mun Kjara­deild Fag­fé­laganna gera launa­kröfu á hendur fyrir­tækjanna fyrir hönd starfs­mannanna, auk þess sem teymið mun verða þeim innan handar að finna ný störf og nýtt heimili.

Í áðurnefndri frétt Mbl.is segir  Davíð Fei Wang, eig­andi veit­ingastaðanna tveggja, að málið sé byggt á mis­skiln­ingi og að lausn hafi verið fundin á því en það sé ekki skilningur aðila á vegum Fagfélaganna.

Nánar er fjallað um málið á vef Mbl.is