Umsátur sérsveitar lögreglunnar í Hafnarfirði á sér stað fyrir utan fjölbýlishús sem er á bak við verslun Nettó og ber sama húsnúmer. Talið er að íbúi í húsinu hafi skotið á bíl fyrir utan. Samningaviðræður lögreglumanna við manninn standa nú yfir.

Að sögn íbúa sem DV náði tali af eru minnst fjórir sérsveitarbílar fyrir utan húsið. Íbúinn, sem er kona, segist hafa sofið af sér skothvellina en samkvæmt upplýsingum sem hún fékk skaut maðurinn annaðhvort út um glugga íbúðar sinnar eða af svölum hennar. Konan segist hafa sofið af sér skothvellina en þegar hún fór út úr húsi og ætlaði til vinnu tóku lögreglumenn á móti henni og báðu hana um að vera innandyra.

Konan getur lítið fylgst með aðgerðum lögreglu úr íbúð sinni. „Mér finnst óþægilegt að fara út svo ég held mig bara inni,“ segir konan. Aðspurð hvort hún upplifi sig örugga segir hún: „Nei, þetta er skrýtin tilfinning, þetta er ekki gott. Ég er dálítið taugaóstyrk út af þessu og það er skrýtið að vita af byssum hérna.“

Konan segir hins vegar að lögreglumennirnir hafi verið mjög vingjarnlegir og kurteisir og það sé óneitanlega hughreystandi að vita af þeim og að þeir séu vopnaðir. „Ég veit að þeir eru með stjórn á ástandinu en það er óþægilegt að vita af því að hér hafi einhver verið að skjóta af byssu út úr íbúðinni sinni. En lögreglumennirnir hafa verið vingjarnlegir og fagmannlegir.“

„Ég horfði niður á næstu hæð og sá að þar voru lögreglumenn með byssur og voru í viðbragðsstöðu,“ segir konan ennfremur.

Hún segir að ekki sé um neitt annað að ræða fyrir sig en halda kyrru fyrir á heimili sínu og bíða þess að umsátrinu ljúki.

DV ræddi annan íbúa, eldri mann, sem sagðist hafa komist að heiman í morgun, um hálfníuleytið, en þá voru lögreglumenn fyrir utan húsið. Hann kemst hins vegar ekki heim til sín aftur og heldur nú til í vesturbæ Hafnarfjarðar þar til málið leysist. Hann segir að nágranni hans hafi hætt við að fara með eiginkonu sína til læknis í morgun og halda þau kyrru fyrir í íbúð sinni. Hvorugur þessara manna heyrði skothvelli í morgun.