Veitingamaðurinn Sigmar Vilhjálmsson átti erfið morgunverkin. Hann greindi frá því á Instagram-síðu sinni að Barion Bryggjan úti á Granda yrði lokuð í dag og mögulega næstu daga því að allir starfsmenn staðarins eru komnir í sóttkví.

„Það er óhætt að segja það að dagurinn í dag byrji með heldur skemmtilegum verkum eða hitt þó heldur. Það er þannig að við getum ekki opnað Barion Bryggjuna, hreinlega, og líklega getum við ekki opnað hana fram að áramótum af því að starfsmenn okkar þar eru komnir í sóttkví. Þeir eru ekki greindir með Covid, heldur komnir í sóttkví og megnið af þeim einkennalausir. En við getum ekki mannað staðinn þannig að við getum ekki opnað. Það er því lokað á Barion Bryggjunni í dag og næstu daga. Er ekki viss hvort að við náum að opna hann fyrir áramót. En þetta er hluti af þessu,“ sagði Sigmar í myndbandinu.

Sjá einnig: Simmi Vill reitti Íslendinga á Twitter til reiði með þessari færslu

Það hefur gustað um Sigmar yfir hátíðarnar en hann birti færslu á Twitter-síðu sinni rétt fyrir jóla þar sem að hann fullyrti að ekki væri lagaleg heimild til þess að skikka fólk í sóttkví eða einangrun og hægt væri að kæra þá niðurstöðu. Færslan vakti usla og varð til þess að fjölmargir hótuðu því að hætta viðskiptum við fyrirtæki sem Simmi rekur.

Veitingamaðurin sá síðan að sér og baðst afsökunar á færslunni og sagði hana vanhugsaða.