Tómas Tómasson, þingmaður Flokks Fólksins, baðst afsökunar á klæðaburði sínum á Alþingi í dag.

Þann 22. Desember hafði hann mætt í gallabuxum á þingfund, en í dag baðst hann velvirðingar á því og tók fram að hann væri kominn í ný föt.

Tómas steig upp í pontu og hélt ræðu er varðaði eldri borgara og fjármál þeirra. Stuttu seinna sneri hann aftur upp í pontu og kom inn á annað mál.

„Síðast þegar ég kom í þennan ræðustól, miðvikudaginn var, þá urðu mér þau mistök á að vera í gallabuxum. Mér var bent á það, góðfúslega, að það tilheyrði ekki siðareglum Alþingis. Ég biðst velvirðingar á því hér og nú, og tilkynni það hér með að ég er kominn í ný föt. Takk.“ sagði Tómas.

Í kjölfar þessarar stuttu ræðu mátti heyra hlátrasköll úr þingsalnum, en svo virðist sem fundargestum hafi fundist afsökunarbeiðnin fyndin.