Bíræfnir búðarþjófar voru staðnir að verki á tveimur stöðum í borginni í sama tíma í gær, kl. 17:30. Í hverfi 112 voru afskipti höfð af manni sem búinn var að setja vörur fyrir rúmlega 33.000 krónur í bakboka. Maðurinn sá að starfsmenn fylgdust með honum og náði að taka vörurnar aftur úr pokanum áður en lögregla kom á vettvang.
Á sama tíma var tilkynnt um þjófnað úr verslun í hverfi 110. Reyndi maður að komast út úr versluninni með fulla matarkörfu. Afskipti voru höfð af manninum fyrir utan verslunina og sagði vegfarandi honum að láta körfuna frá sér. Mun maðurinn þá hafa kastað körfunni frá sér og hlaupið but.
Þetta kemur fram í dagbók lögreglu. Samtals voru 116 mál skráð hjá lögreglu frá kl. 17 í gær til 5 í morgun, þar af voru rúmlega 20 tilkynningar um tónlistar- og partýhávaða. Sex voru vistaðir í fangageymslu lögreglu.
Rétt um miðnætti í gærkvöld var tilkynnt um yfirstandandi innbrot í miðbænum. Maður í annarlegu ástandi var handtekinn á vettvangi grunaður um tilraun til innbrots. Hafði hann brotið rúðu og stormjárn á glugga. Maðurinn var vistaður fyrir rannsókn máls í fangageymslu lögreglu.
Umferðardeild lögreglunnar ásamt lögreglu úr Hafnarfirði og Kópavogi var með eftirlitspóst í Kópavogi í gærkvöld. Voru 352 bílar stöðvaðir og athugað með ástand ökumanna. Voru þrír ökumenn handteknir, grunaðir um ölvun við akstur. Voru þeir látnir lausir að lokinni sýnatöku.
