María Guðmundsdóttir leikkona lést á Landspítalanum á þriðjudagsmorgun, þann 14. desember. Dóttir hennar, Dóra G. Wild, tilkynnti um andlátið á Facebook og segir:
„Betri mömmu og vinkonu er ekki hægt að hugsa sér. Það er svo ósköp sárt að hugsa til þess að hún sé farin frá okkur. Útförin verður auglýst síðar.“
Dóra segir í samtali við DV að móðir hennar hafi verið veik í nokkur ár en þó var það bara síðustu mánuði, eða síðasta árið, sem veikindin voru erfið. Hún var þó heima hjá sér fram undir það síðasta.
María var fædd 9. nóvember árið 1935 og varð því 86 ára í síðasta mánuði. Hún sló í gegn í gamanþáttunum Steindinn okkar og Steypustöðin. Dóra minnir þó á að María hafi einnig vakið athygli fyrir hressilegan leik í kvikmyndinni Perlur og svín. „Þar lék hún alveg hræðilega fyllibyttu,“ segir Dóra og hlær.
Dóra segir að leiklistarferill móður hennar, og hennar sjálfrar um leið, hafi byrjað árið 1994, er þær gengu saman í Leikfélag Mosfellssveitar. „Við fórum saman í Leikfélag Mosfellssveitar árið 1994, við mæðgurnar, og tókum þetta bara með trompi. Hún ívið meira, en við störfuðum með leikfélaginu æ síðan og það hefur verið okkar ær og kýr. Það er bara fjör.“
Dóra minnist móður sinnar með miklum hlýhug og víst er að María gladdi hjörtu margra landsmanna og kitlaði hláturtaugar þeirra með sínum skemmtilegu og bráðfyndnu tilþrifum. „Hún var bara yndisleg,“ segir Dóra.
